Wednesday, October 2, 2019

रुळावल्या आठवणी

रुळावरून गेली गाडी
दूर आठवांच्या गावा
तिथे मायेचा निर्झर
इवल्या स्वप्नांचा थवा
पारिजात अंगणात
गंध ओतत सांडेल
मोहक अबोली
फिक्या जुईशी भांडेल
तिथे कुंकवाची डबी
जास्वंदीत लवंडली
नवी गुलाबाची कळी
लाल होईतो लाजली
माझं बालपण तिथे
खेळताना सापडेल
तिच्या मऊसूत ओल्या
पदरात आढळेल
माझ्या राठल्या केसात
फिरे मायेचा गं हात
सोडे आठवांचा धूर
गाडी दूर दूर जात...
सोडे आठवांचा धूर
गाडी दूर दूर जात...

No comments:

Post a Comment