दृष्टांत

अदृश्यातही तूच भासतेस
श्वासांच्या अंतरावर
अखंड चाले आपुली बडबड
भासांच्या तंत्रावर

अदृश्यातल्या तुझ्या गं गाली
पडते जेंव्हा खळी
माझी मी मलाच देतो
कचकन कोपरखळी

फसवे होते तुझे ते नसणे
हसणे कानी येते
माझे असणे तुझेच असणे
ऐसी ग्वाही देते

दिन सरला मी तुला संगतो
स्वप्न उद्याची तुला सांगतो
सांगतो मी सारे सारे
अविचल अंतरिक्ष
निश्चल वारा
अबोल सारे तारे

ग्वाही ना कुणाची
सही ना कुणाची
कुठले करार झाले
फितूर क्षणांचे
आतुर मनाचे
साक्षी फरार झाले

सारे साक्षी फरार झाले...